مجھے اے اہلِ کعبہ یاد کیا مے خانہ آتا ہے
اِدھر دیوانہ جاتا ہے، اُدھر پروانہ آتا ہے
نہ دل میں غیر آتا ہے، نہ صاحب خانہ آتا ہے
نظر چاروں طرف ویرانہ ہے، ویرانہ آتا ہے
تڑپتا، لوٹتا اُڑتا جو بے تابانہ آتا ہے
یہ مرغِ نامہ بر آتا ہے یا پروانہ آتا ہے
مرے مژگاں سے آنسو پونچھتا ہے کس لیے ناصح
ٹپک پڑتا ہے خود، جو اس شجر میں دانہ آتا ہے
وہ نازک ہیں تو کیا اپنے سے خنجر پھر نہیں سکتا
تجھے کچھ ننگ بھی اے ہمتِ مردانہ آتا ہے
ترا کوچہ ہے وہ دارالشفا بیمارِ وحشت کو
پری آتی ہے بن جاتا ہے جو دیوانہ آتا ہے
دمِ تقریر نالے حلق میں چھریاں چبھوتے ہیں
زباں تک ٹکڑے ہو ہو کر، مرا افسانہ آتا ہے
رخِ روشن کے آگے شمع رکھ کر وہ یہ کہتے ہیں
اُدھر جاتا ہے دیکھیں، یا اِدھر پروانہ آتا ہے
جگر تک آتے آتے سو جگہ گرتا ہوا آیا
ترا تیرِ نظر آتا ہے یا مستانہ آتا ہے
کبھی چلنا کبھی رکنا کبھی ملنا کبھی کھنچنا
ترے خنجر کو ہر اندازِ معشوقانہ آتا ہے
وہ شوخی، وہ شرارت، بے حیائی، فتنہ پردازی
تجھے کچھ اور بھی اے نرگسِ مستانہ آتا ہے
سکندر آئنے سے، جام سے جم خوش نہ ہو اتنا
کوئی مے کش کو دیکھے ہاتھ جب پیمانہ آتا ہے
بھرے کچھ آنکھ میں آنسو، پڑے کچھ حلق میں چھالے
قفس میں یہ میّسر مجھ کو آب و دانہ آتا ہے
وہی جھگڑا ہے فرقت کا، وہی قصّہ ہے الفت کا
تجھے اے داغ کوئی اور بھی افسانہ آتا ہے
